Tamara Río, con ampla experiencia como coreógrafa, nova profesora de danza clásica e contemporánea no Conservatorio

3 de outubro de 2018. Unha das novidades do Conservatorio municipal para o curso 2018-2019 é a recuperación das clases da danza clásica e contemporánea. Para reforzar estas disciplinas, o Concello de Monforte conta cunha nova profesora, a lucense Tamara Río Simón, Premio Fin de Grao en Danza Clásica e en Danza Contemporánea polo Conservatorio Profesional de Lugo.

Ademais da súa titulación en ámbalas dúas disciplinas, Tamara conta cunha ampla experiencia: impartiu clases en varios colexios da cidade das Murallas, entre eles, os Maristas, Milagrosa e Galén; así como en diferentes escolas de danza e ximnasia rítmica.

Por outra parte, a nova profesora do Conservatorio Mestre Ibáñez posúe experiencia escénica, tanto na modalidade clásica coma contemporánea. Entre outros traballos, destacan:

 

-Gala San Froilán de Lugo (Amelie, Contravento, Mamá Tierra)

-Gala UNICEF, Círculo das Artes de Lugo (Bella Durmiente)

-Arde Lucus (Espartaco)

-Diversas galas de clausura do Conservatorio Profesional de Danza de Lugo, no auditorio Gustavo Freire

-Concursante do programa de televisión Fama Revolution, de Cuatro

Polo que respecta ás clases de danza tradicional galega, estarán a cargo de Teresa Álvarez.