Actualidade

SESIÓN ASTRONÓMICA -O CAMIÑO DAS ESTRELAS-AS ESTRELAS DO CAMIÑO/XOVES 23 DE SETEMBRO DE 2021 ÁS 21:00 H NO CAMPO DA COMPAÑÍA

 

O xoves 23 de setembro ás 21:00h e na praza da Compañía terá lugar unha observación astronómica nocturna baixo o título O CAMIÑO DAS ESTRELAS. AS ESTRELAS DO CAMIÑO.

A Universidade de Santiago de Compostela e o Observatorio Astronómico Ramón María Aller e financiando pola Consellería de Cultura e Turismo da Xunta de Galicia dentro de O teu Xacobeo, xunto co Concello de Monforte de Lemos programan esta actividade de divulgación astronómica nocturna.

O propósito é poñer en valor o significado da Vía Láctea e a súa relación co Xacobeo, explicando en que condicións marca o camiño cara a Compostela. O proxecto adentrará ós participantes no mundo da astronomía mediante a visión nocturna tanto a simple vista como con telescopios.

Debido a situación sanitaria é obrigatorio o uso de máscaras, haberá que gardar a distancia de seguridade e haberá prazas limitadas.

CONCERTO DE XABIER DÍAZ & ADUFEIRAS DE SALITRE-venres 24 de setembro ás 20:00 no edificio multiusos

O Concello de Monforte de Lemos xunto co AGADIC da Consellería de Cultura, Educación e Universidade da Xunta de Galicia e dentro do 9º ciclo CULTURA NO CAMIÑO /Xacobeo 21-22, programa o concerto "As catedrais silenciadas" de Xabier Díaz & Adufeiras de Salitre no edificio multiusos o venres 24 de setembro ás 20:00 h e cun aforo reducido debido á covid-19.

As Catedrais Silenciadas é o terceiro álbum do músico Xabier Díaz xunto coas Adufeiras de Salitre, quizais a obra que mellor reflicte a esencia do seu encontro e probablemente a que explora os límites deste formato con máis profundidade.

O título é un berro de alerta ante o progresivo despoboamento do rural e a perda identitaria que isto implica: a desaparición da cultura que temos e que fundamenta a nosa diferenza no mundo.

A entrada é gratuita ata completar a capacidade do edificio seguindo a normativa sanitaria no momento da actuación. A entrega de invitacións realizarase dende ás 18:00 h e a entrada o salón de actos comezará ás 19:30 h.

CONCERTO DA ORQUESTRA VIGO430 DOMINGO 26 DE SETEMBRO DE 2021 ÁS 20:00 H NO EDIFICIO MULTIUSOS /XACOBEO 20·21

O domingo 26 de setembro ás 20:00 h e no Edificio Multiusos terá lugar un concerto da Orquestra Vigo430. Espectáculo programado polo Xacobeo 21·22 da Xunta de Galicia, contando coa colaboración da Sociedad Filarmónica de Monforte e o Concello de Monforte de Lemos.

O proxecto da Orquestra Vigo 430 nace no 2005, aínda que adquire a súa configuración definitiva a partires do 2014.

O seu obxectivo principal é dotar unha formación orquestral profesional, constituída na súa maior parte polos máis brillantes expoñentes das novas xeracións de músicos galegos, así como por destacados músicos freelance do resto de España e do estranxeiro. Esta combinación entre talento propio e foráneo é unha característica esencial para a obtención do resultado artístico marcado como obxectivo.

Entre os principais retos que persegue o proxecto está o do achegamento da música clásica a novos públicos potenciais, así como ás novas xeracións de oíntes. O obxectivo de eliminar a barreira psicolóxica que, para gran parte da poboación, existe á hora de achegarse a un concerto de música clásica.

No ano 2014 a orquestra recibiu o premio «Martín Códax» da música.

PROGRAMA:
JUAN DURÁN: Variaciones sobre "Rosa de Abril" (estrea absoluta)
Turina. Oración del torero
Dvořák. Serenata para cordas
Bartók. Danzas rumanas

Na actuación da Orquestra Vigo 430 en Monforte participarán 25 músicos dirixidos por dona Isabel Rubio sendo o seu solista ao piano D. Antonio Queija.

A entrada é gratuita ata completar a capacidade do local seguindo a normativa sanitaria no momento da actuación. A entrada ó salón de actos realizarase ás 19:40 h e a entrega das invitacións será dende as 19:00 h.

XORNADA EUROPEA DA CULTURA XUDEA setembro 2021

Monforte de Lemos pertence, xunto con outras  poboacións de España, á Asociación “Red de Juderías de España - Caminos de Sefarad”. A inclusión da cidade na citada asociación representa un recoñecemento ó seu rico pasado medieval e en particular á pegada hebrea no mesmo. O Concello de Monforte de Lemos considera moi importante o feito de pertencer a esta asociación polas posibilidades que permite de divulgación do patrimonio histórico e artístico da cidade.

Co contexto sinalado relaciónanse unha serie de actividades que se desenvolven anualmente destacando, ó igual que noutras poboacións pertencentes á “Red de Juderías de España - Caminos de Sefarad” as relacionadas coa Xornada Europea da Cultura Xudea que dende o venres 3 de setembro se celebran na nosa cidade.

O concello de Monforte de Lemos programa para esta Xornada catro actividades.

Dende o 3 e ata o 30 de setembro na zona de ámbito xudeo de Monforte poderase participar no xogo BUSCA A CHAVE DO DIÁLOGO, xogo que entrando na web neste enlace e completando tres pequenas probas en tres diferentes puntos da zona histórica monfortina conseguirase a Chave do Diálogo. Entre os gañadores da chave sortearase unha fin de semana completa nunha das cidades da Red de Juderías. As instrucións para participar poden consultarse en redjuderias.org/dialogos.

 

 

A derradeira actividade desta Xornada Europea da Cultura Xudea será o xoves 16 de setembro cun concerto de 2NAFRONTEIRA co espectáculo "A voz da pedra é sefardí". A actividade está subvencionada pola Xunta de Galicia no seu programa Cultura no Camiño e realizarase no Edificio Multiusos ás 20:15 h. A entrada é gratuita ata completar a capacidade do local seguindo a normativa sanitaria no momento da actuación.