Monforte de Lemos, 25 de febreiro de 2026. O Alcalde de Monforte, José Tomé Roca, recibiu este mércores no seu despacho da Casa do Concello ao novo Tenente Xefe do Destacamento de Tráfico da Garda Civil de Monforte de Lemos, Anxo Rodríguez Rodríguez, que tomou posesión do seu cargo recentemente.
Acompañado pola Tenente Alcalde, Gloria Prada, o rexedor deulle á benvida á cidade e mantivo unha primeira toma de contacto na que fixeron un repaso do estado actual da seguridade do tráfico no municipio de Monforte. Así mesmo, ambos representantes expresaron a firme vontade de manter a colaboración entre os diferentes corpos de seguridade, neste caso Policía Local e Garda Civil. “Neste primeiro encontro abordamos aspectos que teñen que ver coa seguridade do tráfico e a necesidade de traballar conxuntamente para que Monforte siga sendo un Concello tranquilo en canto á seguridade viaria”.
Anxo Rodríguez Rodríguez é ourensano e incorpórase ao novo cargo tras prestar servizo na unidade de Seguridade Cidadá da Comandancia da Garda Civil de Ourense.