Actualidade

ESPECTÁCULO DO MAGO TETO /ALQUIMIA domingo 4 de decembro ás 18:00 h no Edificio Multiusos

O domingo 4 de decembro ás 18:00 h no Edificio Multiusos de Monforte o Concello de Monforte de Lemos programa dentro da Rede de Teatros e Auditorios da Xunta de Galicia un espectáculo para público infantil e familiar do MAGO TETO titulado ALQUIMIA.

Durante milleiros de anos, os alquimistas, nómades con grandes coñecementos nas matemáticas, na física, na química, na astroloxía e incluso no ocultismo, viaxaron cos seus laboratorios ambulantes por todos os lugares do mundo cun obxectivo concreto. Ese obxectivo era atopar a Pedra Filosofal.

O soño dos alquimistas era dominar a natureza, o lume, e finalmente o tempo. Os alquimistas crían que a pedra filosofal podería concederlles tanto a cura de todas as enfermidades para gozar da vida eterna como a riqueza, transformando metais en ouro. Cando conseguían estes logros, coñecíase como "A gran Obra".

Nesta nova aventura, o mago Teto, tras varios anos estudando, experimentando e intentando descifrar a estraña simboloxía dos libros sobre alquimia, ponse na pel dos alquimistas perseguindo o seu soño e buscando a pedra filosofal; non para conseguir a riqueza e a vida eterna, senón a alquimia que está dirixida ao corazón, ¡¡a felicidade!!.
A felicidade do público e do propio mago e así lograr a súa "Gran Obra".

Auga, terra, lume e aire farán posible esta nova aventura do mago Teto.

O prezo da entrada xeral para esta obra será de cinco euros e tres para nenos, desempregados, xubilados e estudantes.

TEATRO na Casa da Cultura Poeta Lois Pereiro, TEATREIRAS con O CRIME DE LADY SIBILA sábado 10 de decembro ás 19:30 h

 

O salón de actos da Casa da Cultura Poeta Lois Pereiro acollerá o sábado 10 de decembro unha representación teatral con entrada libre e gratuita. Representación que poñerá en escena o grupo monfortino de teatro “TEATREIRAS”.

O espectáculo, que leva por título "O crime de Lady Sibila" é unha obra que encherá de bo teatro a Casa da Cultura de Monforte a partir das 19:30 horas.

Esta obra teatral está incluida na programación do CIRCUÍTO DE TEATRO AFECCIONADO da Vicepresidencia Deputación de Lugo -Cultura.

Teatreir@s, é un grupo de teatro que xurdíu hai case 20 anos no contexto das actividades de tempo libre para persoas maiores que se organizaban desde os Servizos Sociais do Concello de Monforte. Hoxe o grupo formado por 11 actores e actrices e baixo a dirección de Paqui Abeledo está constituido dentro dunha asociación de teatro afeccionado.

Instalación dun BELÉN na Casa da Cultura Poeta Lois Pereiro

 

Do 14 de decembro ó 12 de xaneiro e na Sala de Exposicións da Casa da Cultura Poeta Lois Pereiro poderase visitar un BELÉN.

Belén de vinte metros cadrados con sesenta figuras de diferentes tamaños (reis magos a cabalo, nacemento, empadroamento, pedindo pousada, fuxida a Exipto, anunciación, Herodes, pastores, animais, comerciantes, romanos, ...) e con toda clases de edificacións como castelo, pousada, forno, ferrería, portal, empadroamento, ... .
A montaxe ten efectos día-noite con fontes e fervenza de auga.

O Belén Hebreo está realizado por D. J. Antonio Dávila.

22ª MOSTRA DE PANXOLIÑAS PARA CENTROS DE ENSINO -Nadal 2022 /Edificio Multiusos, xoves 15 de decembro ás 18:00h

 

O xoves 15 de decembro ás 18:00 h e no Edificio Multiusos, nenas e nenos de diferentes centros de ensino interpretarán composicións musicais de Nadal dentro da Mostra de Panxoliñas para Centros de Ensino de Monforte de Lemos organizada pola Delegación Municipal de Cultura.

A mostra, que se desenvolve en todas as edicións con grande éxito, chega este ano á súa vixésima segunda convocatoria e ten como fin un ano máis espertar a afección ao canto coral e á música entre os nenos e nenas dos centros de ensino da cidade.

Nesta 22ª edición os centros de ensino participantes son:

  • COLEXIO PP. ESCOLAPIOS
  • FUNDACIÓN EDUCATIVA TORRE DE LEMOS
  • COLEXIO P. FERROVIARIO

TEATRO na Casa da Cultura Poeta Lois Pereiro, GRUPO DE TEATRO VIRAVENTOS con PERFECTOS DESCONOCIDOS, sábado 17 de decembro ás 19:30 h

 

O salón de actos da Casa da Cultura Poeta Lois Pereiro acollerá o sábado 17 de decembro ás 19:30 horas, unha representación teatral con entrada libre e gratuita.

O GRUPO DE TEATRO VIRAVENTOS  poñerá en escea "Perfectos descoñecidos".

Esta representación teatral está incluida na programación do proxecto CIRCUÍTO DE TEATRO AFECCIONADO 2022 da Vicepresidencia Deputación de Lugo -Cultura na que participa o Concello de Monforte de Lemos.

O Grupo de Teatro Viraventos xurdiu hai 21 anos no contexto das actividades de tempo libre para persoas maiores que se organizaban dende os Servizos Sociais do Concello de Monforte. Nestes anos, contou coa participación de mais de medio cento de persoas que levaron a cabo, curso tras curso, a montaxe e representación de 30 obras de teatro, clásicas, adaptadas e de creación propia. Moi activos nas súas actividades, teñen actuado en colexios, festas populares, festas medievais, recitais... e desde hai anos, forman parte do Proxecto de tr¡eatro Afeccinonado da Deputación de Lugo.

O APALPADOR -Nadal 2022 /rúas da cidade e zona mercados, sábado 24 de decembro pola mañá

 

Monforte de Lemos terá o vindeiro sábado 24 de decembro a visita do APALPADOR, os monfortinos xunto cos visitantes a nosa cidade poderán disfrutar deste típico personaxe polas rúas de Monforte e na zona de mercados da praza de Abastos dende ás 11:00h, o Apalpador virá acompañado dun músico amigo seu.

O Apalpador, o mítico personaxe da tradición popular galega, nado no Courel, ligado ás festas do Nadal, grandullón, bo, de mirada doce e longas barbas coloradas, que durante o ano fabrica carbón, vive dos froitos silvestres, da caza de xabaríns, que recolle mel e fai aparecer coas ramas dos bosques os xoguetes que as madeiras esconden, percorrerá co seu abrigo cheo de remendos e a grandes zancadas xunto cun músico amigo seu as rúas da nosa cidade de Monforte a mañá do 24 de decembro.

Esta animación corre a cargo de Anxo Moure (apalpador) e Servando Barreiro (músico).

CONCERTO PARA BEBÉS "A COBA DAS LETRAS -SON NO BERCE de CRISTINA COLLAZO" MARTES 27 DE DECEMBRO DE 2022 NO EDIFICIO MULTIUSOS

 

O martes 27 de decembro ás 17:00 e ás 17:30 h, no Edificio Multiusos terá lugar uns concertos sensoriais para bebés de 0 a 3 anos titulado "Cova das Letras -O son no berce" de Cristina Collazo, actividade deseñada dentro da programación da Rede Galega de Dinamización Lingüística da Xunta de Galicia de 2022 xunto co Concello de Monforte de Lemos, no programa Nadal na Rede.

Espectáculo gratuito e no que para participar haberá que inscribirse previamente no 982 404 404.

ESPECTÁCULO TEATRAL PARA PÚBLICO FAMILIAR -FILIPA COS CONTOS con FRAN CAMPOS -Nadal 2022-23 /Casa da Cultura Poeta Lois Pereiro, mércores 4 de xaneiro ás 18:00 h

 

O Concello de Monforte de Lemos e dentro da programación do Nadal 2022-23, programa un ESPECTÁCULO TEATRAL PARA PÚBLICO FAMILIAR titulado FILIPA COS CONTOS con FRAN CAMPOS, espectáculo que terá lugar na Casa da Cultura Poeta Lois Pereiro o mércores 4 de xaneiro ás 18:00 h.

Filipa cos contos é unha sesión de contos tradicionais, populares e inventados. Con música e cancións en directo para contar e cantar.

Conta con dous narradores: o actor e contador, Fran, e un monicreque que manexa o propio actor: Filipa. Entre os dous vanse repartindo as historias, relacionándose entre eles e ó mesmo tempo co público.

Espectáculo creado pola Compañía Bandullo Azul

A representación teatral está deseñada para público familiar, con entrada libre e gratuita ata completar o aforo.