Actualidade

O Concello de Monforte programa dentro da XXII Feira Medieval do 2026 o XII concurso de axudas para a confección de traxes medievais.

Os prazos para participar neste concurso son:

• Do 2 ó 13 de febreiro os interesados en recibir a axuda chamarán ás radios locais
• O 16 de febreiro as radios emitirán unha lista coas persoas solicitantes
• Do 20 ó 27 de febreiro os participantes das listas pasarán polo concello para realizar a solicitude formal de subvención
• O 4 ou o 5 de abril presentación dos traxes na oficina da Feira Medieval para a súa comprobación
• Do 6 ó 15 de abril presentación no rexistro municipal da factura xustificativa do gasto

 Bases 2026

O xoves 26 de febreiro ás 20:15 h e no Edificio Multiusos terá lugar a terceira cita co teatro para adultos dentro da programación da Rede Galega de Teatro e Auditorios do primeiro semestre de 2026 en Monforte de Lemos.

A compañía PRODUCIÓNS TEATRAIS EXCÉNTRICAS representa AS DESTERRADAS obra escrita por Carme Varela (25º Premio Álvaro Cunqueiro para textos teatrais), baixo a adaptación e a dirección de Quico Cadaval, coa escenografía de Marcelino de Santiago, Kukas. Cun deseño de Norths SDN, deseño iluminación Javier Gey, vestiario Celia Sineiro e música de Fernando Reyes.

No século XVI unha pequena comunidade de monxas á beira do Miño vese ameazada pola cobiza da hierarquia eclesiástica. Os señores da Igrexa, para rematar coa resistencia das freiras non dubida en difamalas e ameazalas por todos os medios, desde o tribunal da inquisición á violencia das mesnadas señoriais. 

Carme Varela reconstrúe nun thriller conventual aqueles tempos de resistencia das comunidades de mulleres autosuficientes e poderosas. A vida parece continuar coas suas rotinas de rezos, bordados e melindres, mais a negra sombra da ameaza exterior abátese sobre o convento de Albeos.

A heroica resistencia daquelas freiras chega agora encarnada nun elenco luxoso -Melania Cruz, Patricia Vázquez, Rebeca Montero, Rocío González, Belén Constenla e Víctor Mosqueira.

O prezo da entrada xeral para esta obra será de cinco euros e tres para desempregados, xubilados e estudantes.

O xoves 12 de marzo ás 20:15 h e no Edificio Multiusos terá lugar unha cita co teatro na programación da Rede de Teatros e Auditorios da Xunta de Galicia en Monforte de Lemos do 2026. 

Actividade deseñada dende o CIM Centro de Información á Muller da Concellería de Muller e Igualdade de Monforte de Lemos, dentro das actividades do Día Internacional da Muller.

A compañía ARTYC CONTENT presenta A HISTORIA VAXENIAL. Raquel Nogueira/Iván Marcos, Premio Luisa Villalta 2024 a Proxectos pola Igualdade.

A Historia Vaxenial segue o ronsel xerado por Historias Vageniales, a exitosa serie web creada pola mesma autora, gañadora dun Premio Mestre Mateo e cuxos episodios foron vistos por centos de miles de persoas.

A obra fai un percorrido pola historia da humanidade para investigar como se representaron os órganos sexuais da muller e analizar como esta representación, ou omisión, estivo emparellada á desconsideración da muller e ao seu lugar no mundo. O tema dá para un drama, certamente. Pero non, A Historia Vagenial é unha comedia (e unha comedia con final feliz).

A Historia Vaxenial é un espectáculo teatral que se atopa a medio camiño entre unha comedia historicista e un evento feminista, entre unha veraz conferencia pedagóxica e un divertidísimo monólogo confesional. A peza é todo un festival de risas e sorpresas que dá luz sobre multitude de cuestións que permaneceron ocultas ás mulleres e que teñen como centro o seu propio corpo e identidade.

A peza está interpretada e co-escrita por Raquel Nogueira, unha das cómicas máis versátiles da súa xeración.

Dirixida e co-escrita por Iván Marcos gañador do Premio Fringe First no Festival de Edimburgo, o Premio Jerwood Foundation, Premio Mestre Mateo, Premio María Casares e actor protagonista de varías películas e produccións de Netflix.

O prezo da entrada xeral para esta obra será de cinco euros e tres para nenos, desempregados, xubilados e estudantes.

O xoves 27 de marzo ás 20:15 h e no Edificio Multiusos o Concello de Monforte continúa coa programación da Rede Galega de Teatro e Auditorios do primeiro semestre de 2026 na nosa cidade.

A compañía CARLOS BLANCO -CON DE TRES PÉS presenta A PENÚLTIMA, obra baixo a autoría, a dirección e a adaptación de Carlos Blanco, cunha escenografía de son e iluminación de Dani Juncal e interpretada por Carlos Blanco.

A PENÚLTIMA
Porque nunca se sabe.
Carlos Blanco bota a penúltima.
Porque o tempo pasa e …
Carlos chega agora con imaxes, con historias novas e vellas pero sempre coas risas garantizadas.
70 minutos con Carlos son sempre breves, divertidos, sanadores … Imprescindibles.
Para non perdelo.

O prezo da entrada xeral para esta obra será de cinco euros e tres para desempregados, xubilados e estudantes.

O xoves 23 de abril ás 20:15 h e no Edificio Multiusos do Concello de Monforte rematan as representacións de teatro profesional adulto da Rede Galega de Teatro e Auditorios do primeiro semestre de 2026 na nosa cidade.

A compañía TEATRO GUIRIGAI representa AMALIA Y EL RÍO, HISTORIA DE UNA ESTRAPERLISTA obra escrita e dirixida por Agustín Iglesias, coa escenografía de Marcelino de Santiago Kukas, deseño de son e iluminación Félix Valverde, vestiario Luisa Santos, música Irma Catalina Álvarez e interpretada por Magda Gª-Arenal e Cándido Gómez.

Amalia y el río, historia de una estraperlista, obra baseada na historia real de Antonia La Lirina veciña de Olivenza (Badajoz), a historia sucede na fronteira entre España e Portugal do ano 1942 ata o 1964, antes de emigrar a Barcelona. 

Un anaco vivo das historias ocultas do contrabando en España protagonizado por unha muller forte, intelixente e sarcástica que pelexou por manter a súa dignidade e o seu dereito ó traballo nunha sociedade profundamente machista.

Cando Amalia volve o seu pobo sempre aparece o mesmo sono: eo río da súa xuventude, os gritos ameazantes de guardinhas e carabineros, mulleres cruzando as frías augas cargadas de vultos, as cancións da súa nai, a alegría da súa amiga Rosa, os segredos da Basilisa, a envexosa da súa sogra, a Pelá –que tantas veces a denunciou–, o simpático Chiribique…

Amalia conta a súa historia dende 1942 a 1964, cando xa viúva e con oito fillos emigra a Barcelona.

O prezo da entrada xeral para esta obra será de cinco euros e tres para desempregados, xubilados e estudantes.

O domingo 26 de abril ás 18:00 h e no Edificio Multiusos terá lugar unha cita co teatro para público infantil e familiar dentro da programación da Rede de Teatros e Auditorios da Xunta de Galicia en Monforte de Lemos do 2026.

A compañía GALEATRO PRODUCIÓNS ESCÉNICAS presenta BERENGUELA NA GAIOLA, obra dirixida a un público a partir de 8 anos, baixo a autoría e a dirección de Paula Carballeira, a adaptación de Galeatro e Xarope Tulú, escenografía de Nicolás Zamorano e As dúas e punto, deseño de son Xavier Bértolo, deseño iluminación e vestiario As dúas e punto, música Xavier Bértolo e interpretada por Alba Bermúdez, Atenea García e Tone Martínez.

Berenguela na gaiola
Nunha residencia da terceira idade traen de volta á Berenguela, unha anciá que aproveita para fuxir en canto pode. Quere volver á súa casa na aldea, onde sempre viviu, onde é feliz. 

Berenguela protesta, rosma, funga, ata que a súa amiga Aurora consegue acougala. Aurora é outra anciá prisioneira, unha anciá que non lembra ben quen é, así que pode ser o que ela queira. Na mesma residencia está Tomás, que pasa o día mirando pola xanela, cismando nas súas cousas, triste e gris. 

Representando Aventuras e desventuras dunha espiña de toxo chamada Berenguela, de Manuel María, as tres anciás atoparán a liberdade que cren perdida e a posibilidade de cambiar o mundo.

Berenguela na gaiola é unha divertida e emotiva proposta para público familiar; unha coprodución de Galeatro e Xarope Tulú co Centro Dramático Galego e o Festival Internacional de Teatro de Carballo (FIOT) con dramaturxia e dirección de Paula Carballeira. A peza foi gañadora do IV Certame Manuel María de Proxectos Teatrais en 2025.

O prezo da entrada xeral para esta obra será de cinco euros e tres para nenos, desempregados, xubilados e estudantes.