Actualidade

Ábrese o prazo de inscrición para participar como cabezudo e xigante nas Festas Patronais de Monforte de Lemos 2022

A partir do xoves 21 de xullo abrirase o prazo para que as persoas que desexen participar como cabezudos e xigantes nas festas patronais do 2022 realicen a pertinente inscrición nas oficinas do rexistro municipal, situadas na Casa do Concello, entre as 9:00 e as 14:00 horas.

O concello dispón de 12 prazas para realizar esta actividade e estas asignaranse por rigorosa orde de inscrición. O derradeiro día para anotarse será o xoves 4 de agosto. Se o número de inscricións supera o número de prazas ofertadas abrirase unha lista de reserva co fin de chamar á persoas desa lista pola orde na que figuren nela no caso de que se produza a imposibilidade de realizar o percorrido nas datas deste ou nalgunha delas por parte dalgunha das persoas con praza.

Os xigantes cabezudos percorrerán as rúas do centro da cidade o 14 de agosto en horario matinal.

Esta actividade terá unha remuneración económica de 25€ e para poder participar nela, ademais de realizar a inscrición no rexistro, haberá que ser maior de idade ou, no caso de ser menor, contar coa preceptiva autorización dos pais ou titores.
Xunto coa solicitude a persoa solicitante deberá presentar copia do seu Documento Nacional de Identidade e no caso de ser menor ademais da autorización dos pais ou titores debe achegarse tamén a fotocopia do DNI da persoa que autorice a participación da persoa solicitante.

Descargas:

Solicitude e procedemento (Instancia) 2022

Autorización

Exposición de carteis do XXVII CONCURSO DE DESEÑO CARTEIS FESTAS PATRONAIS, do 18 de xullo ó 16 de agosto na Casa da Cultura Poeta Lois Pereiro

 

Do 18 de xullo ó 27 de agosto de 2022 e na Sala de Exposicións da Casa da Cultura Poeta Lois Pereiro do Concello de Monforte, realizarase unha exposición dos 18 carteis presentados ao XXVII CONCURSO DE DESEÑO DE CARTEIS FESTAS PATRONAIS -2022, concurso organizado polo Concello de Monforte de Lemos.

O cartel gañador foi o traballo presentado por CÉSAR ÁLVAREZ NÚÑEZ, que se presentou baixo o pseudónimo de Identidade.

O Alcalde presenta o programa de concertos musicais das Festas Patronais 2022 de Monforte, que contará cun día máis de festas

O Alcalde de Monforte, José Tomé Roca, acompañado pola concelleira de Cultura, Marina Doutón, e a 1º Tenente de Alcalde, Gloria Prada, deu a coñecer hoxe mediante rolda de prensa o programa de Concertos Musicais das Festas Patronais 2020, que se van celebrar do 10 ó 16 de agosto.  

“Por fin”, salientou o Alcalde, “despois de dous longos anos, en 2022 Monforte volverá a celebrar as súas Festas Patronais, dando un paso definitivo cara á normalidade que todos desexamos, tal como dixen, neste ano imos organizar todos os eventos con normalidade. Unhas Festas Patronais que van recuperar a esencia que tiveron nos últimos 7 anos, con concertos masivos e gratuítos na explanada da Compañía, porque xa temos ganas de vela chea de xente como antes da pandemia”.

 

Un día máis de Festas Patronais

O Alcalde, na súa intervención, aproveitou para confirmar o que xa anunciara hai un tempo, en relación coas Festas Patronais: “Para dar cumprimento ó meu compromiso cos monfortinos e coas monfortinas, este ano teremos un día máis de Festas Patronais pasando de 5 a 6 días. De tal xeito que o día do Pregón será o día 10 de agosto e os concertos empezarán o día 11 e rematarán o día 16 de agosto. En total serán 6 días de festa máis o Pregón, o que supón 7 días de Festas, porque como é habitual con este Goberno, o día do Pregón tamén haberá unha actuación musical na Praza de España”.

Deste xeito, o programa completo de actuacións musicais das Festas Patronais de Monforte deste ano 2022 son as seguintes:

Mércores 10 de agosto: 

  • PREGÓN
  • Actuación musical na Praza de España, que se incluirá dentro das actividades do Verán Cultural.

Xoves 11 de agosto:

  • Orquestra FINISTERRE: 22:30 a 00:00h / 03:00 a 04:30h.
  • Orquestra PANORAMA: 00:00 a 03:00 h. (un único pase)

Venres 12 de agosto:

  • LA OREJA DE VAN GOGH: 00:00 a 01:30 h.
  • Orquestra LOS SATÉLITES: 23:00 a 00:00 h / 01:30 a 03:30 h.

Sábado 13 de agosto:

  • EDURNE: 23:00 a 00:30 h.
  • GIN TONI´S: 00:30 a 02:30 h.
  • MALENNE: 02:45 a 04:00 h.

Domingo 14 de agosto:

  • ROSARIO FLORES: 23:00 a 00:30 h.
  • Orquestra LOS PLAYER`S: 00:30 a 02:00 h. / 02.30 a 04:00 h.

Luns 15 de agosto:

  • ANA MENA: 00:30 a 02:00 h.
  • Orquestra COSTA DORADA: 23:00 a 00:00 h / 02:00 a 04:00 h.
  • Fogos artificiais de San Vicente: 00:00 a 00:30 h.

Martes 16 de agosto:

  • MAGO DE OZ: 00:30 a 02:00 h.
  • Orquestra ACORDES: 23:00 a 00:00 h / 02:00 a 04:00 h.
  • Fogos artificiais do Río Cabe: 00:00 a 00:30 h.

 

Deste xeito, as actuacións musicais empezarán ás 11 da noite e rematarán ás 4 da madrugada.

O mandatario local manifestou que “estamos convencidos de que os concertos que temos programados van ser capaces de encher o recinto das Festas, debido á calidade das actuacións e tamén debido ó variado estilo musical dos concertos”.

 

Nova escenografía

Outra novidade que anunciou o Alcalde para as Festas Patronais deste ano, vai ser a produción. Deste xeito, o escenario vai ter unhas maiores dimensións, unha mellor sonoridade, e estará cuberto, o que vai permitir que aínda que chova algo, os concertos vanse celebrar igual.

En conxunto trátase dunha nova escenografía, que propiciará un aspecto visual moito mellor, o que leva consigo un incremento no custe da produción.

 

Fogos artificiais

Do mesmo xeito, o Alcalde tamén anunciou que as “Festas van contar cos Fogos de San Vicente na Torre da Homenaxe e tamén van contar cos Fogos do Río Cabe, tal e como se veñen disparando dende que os recuperamos en 2015”.

Do mesmo xeito, indicou que “o Programa Cultural do Verán e outras actuación ó longo do verán, darémolo a coñecer máis adiante, e nel van ter cabida os grupos e músicos monfortinos, para saír adiante xuntos e non deixar a ninguén atrás, así que os artistas monfortinos van ter cabida nas Festas e na programación do Verán Cultural”.

 

Alcalde rematou salientando que “con este cartel, estamos convencidos que van ser unhas boas Festas, nas que van participar masivamente os monfortinos, e tamén van atraer a visitantes, dado que hai música para todos os gustos e iso vai ser bo para a economía monfortina, especialmente para o comercio e para a hostalería”.

 “Deste xeito, cumprimos coa palabra dada, como é habitual en todos os proxectos que anunciamos, e as Festas Patronais non poden ser menos.”