Monforte de Lemos, 11 de marzo de 2026. O Concello de Monforte convocou este mércores un minuto de silencio en lembranza e solidariedade coas vítimas do terrorismo. Súmase con este xesto á conmemoración do Día Europeo das Vítimas do Terrorismo, establecido pola Unión Europea o 11 de marzo, día no que se produciron os tráxicos atentados terroristas de Madrid, en 2004.
Deste xeito, o Alcalde de Monforte, José Tomé Roca, a Tenente Alcalde Gloria Prada, os Concelleiros e Concelleiras José Manuel Mougán e Regina López, así como outros membros da Corporación municipal e persoal do Concello concentráronse na mañá deste mércores fronte a fachada da Casa do Concello, ás 12.00 horas, e gardaron un minuto de silencio en apoio e solidariedade coas persoas que se viron afectadas polo terrorismo e como mostra de rexeitamento e condena a todos os actos de barbarie.
O Concello de Monforte súmase así á proposta da Federación Española de Municipios e Provincias, FEMP, de lembrar ás vítimas do terrorismo nunha data que cobra especial significado no noso país, polo doloroso recordo dos atentados de Madrid. En memoria de todas as vítimas e solidariedade coas súas familias e seres queridos, celebrouse este minuto de silencio no Concello de Monforte.