Monforte de Lemos, 9 de abril de 2026. O Alcalde de Monforte, José Tomé Roca, informa do inicio do procedemento de contratación do servizo de cafetería do recentemente reformado Complexo Deportivo da Pinguela. A Xunta de Goberno Local do luns 7 de abril acordou iniciar os trámites para adxudicar a explotación mediante concesión demanial e aprobou os pregos que rexerán o procedemento.
O prezo mínimo establecido para prestar este servizo é de 400€ mensuais (4.800€/ano) ao que se engadirán os impostos correspondentes. O prazo de duración será de 2 anos, coa posibilidade de dúas prórrogas anuais de ano en ano, de xeito que a duración total da presente concesión, incluídas as prórrogas, non poderá exceder de 4 anos.
A licitación publicouse este mesmo xoves, 9 de abril, na Plataforma de Contratación do Sector Público e o prazo de presentación ofertas esténdese ata o vindeiro venres 24 abril. Unha vez resolto o procedemento administrativo de adxudicación e formalizada a sinatura do contrato, procederase á apertura do servizo.
Un servizo de calidade
A cafetería consta dun espazo de 105 m2 e dispón de barra e todo o mobiliario interior necesario para a explotación. A instalación, completamente renovada, conta cunha ampla cristaleira con vista ás piscinas e dará servizo á Piscina Municipal e ó Pavillón, polo que se prevé unha alta afluencia de deportistas, clubs, persoal técnico e público asistente a eventos deportivos e público xeral.
“Son moitas as persoas usuarias que utilizan diariamente estas instalacións e queremos ofrecer un servizo de calidade”, apunta o Alcalde. Neste senso, lembra que trala reforma integral primeiro do Pavillón e posteriormente da Piscina, a infraestrutura funciona agora como un complexo deportivo xestionado de forma conxunta.
Características e horarios
A cafetería prestará servizo durante toda a tempada de apertura do complexo deportivo (de xaneiro a decembro) e estará obrigada a manter o servizo no seguinte horario mínimo e máximo:
De luns a venres:
-Mínimo: de 8.00 a 13.00 h e de 16.00 a 21.00 horas.
-Máximo: de 7.30 a 14.00 e de 15.00 a 23.00 horas.
Fins de semana e festivos:
-Mínimo: Sábados: de 10.00 a 14.00 e de 18.00 a 22.00 h.
Domingos e festivos: de 10.30 a 14.30 h.
Nos fins de semana e festivos nos que haxa algún tipo de evento ou competición deportiva cuxo horario non estea dentro do mínimo establecido, o concesionario deberá prestar o servizo, a excepción dos domingos e festivos en horario de tarde. Neste caso deberá abrir, como mínimo, 30 minutos antes do evento e ata 30 minutos despois do remate.
Un complexo deportivo completamente renovado
A cafetería dará servizo ao Complexo Deportivo de A Pinguela, que foi profundamente remodelado coa reforma integral do Pavillón Polideportivo no 2023 e da Piscina, inaugurada en outubro de 2025. Ambas infraestruturas suman unha inversión de 6 millóns de euros dirixida a renovar estas instalacións deportivas “creando un complexo deportivo único, eficiente e moderno”, indica o Alcalde.