Monforte de Lemos, 28 de maio de 2026. O Alcalde de Monforte, José Tomé Roca, ven de informar da realización dos traballos de colocación do AZUD desmontable da Lagoa da Pinguela, no Parque de Cobas, que foron levados a cabo hoxe, xoves 28 de maio.
A colocación desta presa desmontable lévase a cabo durante a primavera para darlle continuidade lonxitudinal ao cauce natural do río Cabe e, ó mesmo tempo, mellorar a recarga subterránea da auga da lagoa, creando unha lámina de auga semellante á que consigue crear a presa do Parque dos Condes.
En época de estiaxe, a lagoa é máis sensible ás variacións que poida haber no río Cabe, xa que, debido aos caudais é mais difícil a recarga superficial da mesma a través do canal de entrada na lagoa.
Este AZUD desmontable retírase no inicio do outono, coa volta das choivas, para facilitar o paso da auga e evitar danos na medida do posible.
Antecedentes
Cabe recordar que no ano 2016, a forza da auga rompera o vello AZUD da Pinguela, e a partir dese momento o Equipo de Goberno iniciou as xestións para repoñer esa presa para que nese entorno que se estaba acondicionando, houbera unha lámina de auga que lle dera unha mellor presencia ó paso do río Cabe por esa zona.
En xaneiro do ano 2022, en rolda de prensa e acompañado polo presidente da Confederación Hidrográfica Miño-Sil, José Antonio Quiroga, o Alcalde presentou o proxecto de acondicionamento da lagoa da Pinguela e a construción dunha nova presa desmontable (AZUD), unha actuación que supoxo un antes e un despois para a zona desta lagoa e o parque de Cobas, e que complementou unha ampla zona de recreo de preto de 3 hectáreas (30.000 m2). O investimento para levar a cabo esta actuación foi de 612.000€.
O proxecto, que se desenvolveu ó longo do ano 2022, foi inaugurado por José Tomé e José Antonio Quiroga en decembro dese mesmo ano. Ademais da instalación desta nova presa desmontable, supuxo o acondicionamento da lagoa da Pinguela e tamén se levou a cabo a construción dun paseo que conforma un circuíto ó seu arredor, completándose así unha ampla zona de recreo de preto de 3 hectáreas do Parque de Cobas.
Polo que respecta á nova presa desmontable, previamente executouse a demolición completa dos restos do AZUD que quedaba no cauce do río, provocada pola erosión que produciran as choivas do ano 2016.
Así, acondicionouse ese cauce cun muro de protección contra a erosión, para poder controlar os efectos que puidera ter o río Cabe neste brazo do río, que tan solo transportaría auga no caso de riadas ou aumentos de caudal.
Para substituír a vella presa, cuxos restos foron retirados para darlle continuidade ó cauce do río (en cumprimento da normativa europea, os cauces dos ríos teñen que ter garantida a conexión lonxitudinal do seu cauce), construíuse un AZUD desmontable que permite dar esa continuidade lonxitudinal ó cauce natural do río Cabe e, ó mesmo tempo, mellora a recarga subterránea da auga da lagoa, creando unha lámina de auga semellante á que consigue crear a presa do Parque dos Condes.
Tamén se incluíu a construción dunha escala de peixes de madeira para garantir a permeabilidade lonxitudinal da fauna piscícola ó longo do río e que o AZUD non supoña un obstáculo para a diversidade da zona.