Monforte de Lemos, 14 de agosto de 2026. O Alcalde de Monforte, José Tomé Roca, xunto co Concelleiro de Deportes, José Manuel Mougán, fixo entrega este venres, 14 de agosto, dos diplomas acreditativos aos 67 nenos e nenas que participaron na terceira quincena do Programa Deportivo de Verán do Concello de Monforte. O acto tivo lugar no Pavillón Polideportivo de A Pinguela, coa participación do técnico municipal de Deportes, Óscar Rodríguez.
A entrega de diplomas desta quenda pecha unha nova edición dos Campamentos Deportivos de Verán que ofreceu actividades lúdicas e deportivas para un total de 245 nenos e nenas de Monforte durante o período estival, co obxectivo de facilitar a conciliación persoal, laboral e familiar nas vacacións escolares”.
O Alcalde, José Tomé, destaca o “importante esforzo que facemos desde o Concello para organizar este programa que ten por finalidade facilitar a conciliación familiar, ao tempo que os nenos e nenas de Monforte desfrutan das súas merecidas vacacións practicando as actividades que máis lles gustan”.
381 inscritos nos Campamentos Deportivos, Campus de Fútbol e Cursos de Tenis
No seu conxunto, o Programa Deportivo de Verán contou ata esta data cunha participación de 381 nenos e nenas: 245 nas tres quincenas dos campamentos deportivos, 105 no Campus de Fútbol Cidade de Monforte-RC Celta de Vigo e 31 nas tres quendas dos Cursos de Tenis.
O calendario do Programa Deportivo de Verán mantén activos os cursos de natación na Piscina Climatizada Municipal e A Pinguela, cunha nova quenda do 16 ao 31 de agosto.