Monforte de Lemos, 15 de agosto de 2026. Na mañá de hoxe, día grande das Festas Patronais de Monforte, o Alcalde José Tomé Roca, encabezando a comitiva institucional, presidiu os actos litúrxicos na honra da Patroa da cidade, a Virxe de Montserrat.
A comitiva oficial encabezada polo Alcalde e formada polo Equipo de Goberno, membros da Corporación Municipal, así como por representantes dos Corpos e Forzas de Seguridade do Estado e diversas autoridades, partiu ás 10.30 horas desde a Praza do Concello, como é tradición, para dirixirse á igrexa de San Vicente do Pino acompañada polo Grupo de Gaitas da Escola Municipal de Monforte de Lemos.
Na chegada da comitiva oficial á igrexa de San Vicente, o rexedor foi recibido polo párroco D. Rafael e deu comezo a Eucaristía na honra da Virxe de Montserrat, que foi cantada pola Coral Polifónica do Concello de Monforte.
A continuación, celebrouse no adro da igrexa a procesión e ofrenda floral á Virxe de Montserrat na que o Alcalde de Monforte, acompañado pola súa esposa, depositou flores ante a Virxe. Tras el, fixérono o resto de membros da Corporación Municipal e demais autoridades presentes, e deseguido, todos aqueles veciños, veciñas e visitantes que quixeron render sentida homenaxe á Virxe.
Día do Gaiteiro e Mostra de Danza e Música Tradicional
Na xornada grande das Festas Patronais de Monforte celébrase tamén o tradicional Día do Gaiteiro, no que participan Redegaita, Lemavos 1, O Cego da Veneira, Gaiteiros de Lemos, Os Triskeles, Os Xograres, Merenzao e Lemavos 2, con pasarrúas pola cidade desde as 11.30 horas.
Pola tarde, ás 20.30 horas, terá lugar na Praza de España a Mostra de Danza e Música Tradicional e, á medianoite, o primeiro dos dous espectáculos de fogos artificiais que ofrecen as Festas Patronais de Monforte, que se lanzarán desde San Vicente ás 12 da noite. Mañá domingo, a sesión de fogos será a mesma hora, desde o río Cabe.
Concerto de Walls e grupos locais
No que se refire aos concertos da Praza da Compañía, este sábado será a quenda de Walls, con protagonismo para os grupos locais, a cargo de Doc Magoo’s e Malenne.
A programación completa desta xornada e do domingo 16 é a seguinte:
Sábado 15. Día da Patroa:
- 10:00 h. Lanzamento de bombas de palenque.
- 11:00 h. Misa e ofrenda floral á Virxe de Montserrat, na Igrexa de San Vicente do Pino.
- 11:30 h. DÍA DO GAITEIRO. Alboradas con grupos de gaiteiros. Saída desde a praza de España e percorrido por diferentes rúas.
- 13:30 h. Concentración dos grupos tradicionais no centro urbano e actuacións ata ás 15:00 h. en diferentes espazos (Praza de Abastos, Praza Doutor Goyanes, centro da cidade, rúa Hermida Balado, Praza de España, avenida de Galicia-taxis, Praza dos Chaos e rúa Cardeal).
- 20:30 h. Mostra de Danza e Música Tradicional, na praza de España.
- 22.30 h. Doc Magoo’s, na praza da Compañía.
- 00:00 h. Fogos Artificiais dende San Vicente
- 00:30 h.- WALLS, na praza da Compañía.
- 02:00 h. Malenne, na praza da Compañía.
Domingo 16:
- 12:00 h. XII Festival Cómico Festivo ‘A rúa é vosa’. Animar-T. Rúa Cardeal.
- 13.00 h. XII Festival Cómico Festivo ‘A rúa é vosa’. Francis Zafrilla. Praza de España.
- 19.00 h. XII Festival Cómico Festivo ‘A rúa é vosa’. Animar-T. Rúa Cardeal.
- 20.00 h. XII Festival Cómico Festivo ‘A rúa é vosa’. Francis Zafrilla. Praza de España.
- 20:30 h. Batucada Baturruca. Desde Rioseco e barrio da Estación, rúas Calvo Sotelo e Roberto Baamonde, ata o centro da cidade.
- 20.30 h. Os Xograres de Lemos. Pasarrúas desde os barrios de A Pinguela e Carude ata o centro da cidade.
- 22:00 h. Grupo América de Vigo, na praza da Compañía.
- 00:00 h. Fogos Artificiais desde o río Cabe.
- 00:30 h. ORQUESTA PANORAMA, na praza da Compañía.
- 02:30 h. Grupo América de Vigo, na praza da Compañía.
- 03:30 h. ORQUESTA PANORAMA, na praza da Compañía.