Monforte de Lemos, 19 de agosto de 2026. A Praza de España de Monforte acolleu este martes, 18 de agosto, a primeira xornada de actuacións musicais dentro do V Ciclo de Concertos de Grupos Monfortinos, que organiza o Concello de Monforte dentro do Programa do Verán Cultural e que nesta edición ofrece 11 concertos en diferentes espazos da cidade.
O certame arrancou este martes coa participación dos grupos SEGUNDA PARTE, ás 22.30 horas, e ROCKIN’KB, ás 0.00 horas, e continuarán con cinco xornadas máis ata o xoves, 27 de agosto.
O obxectivo deste ciclo de concertos é dar visibilidade e proxección ás bandas de música local ofrecendo aos artistas monfortinos un espazo para dar a coñecer o seu traballo ante o público. “Queremos que os grupos monfortinos sexan os protagonistas e que a veciñanza teña a oportunidade de descubrir e desfrutar da música que se fai na nosa propia cidade”, indica o Alcalde, José Tomé. Deste xeito, a programación funciona como un punto de encontro entre os músicos locais e a veciñanza, ao tempo que contribúe a dinamizar a actividade cultural de Monforte.
Os concertos continúan hoxe coa actuación do grupo NECTARINE SOUL na Praza da Estación. Nesta xornada estaba prevista tamén a actuación de CERO2CERO, pero debido ao falecemento dun familiar cercano dun dos seus integrantes, este grupo non vai actuar. Por tal motivo, producirase un cambio no horario previsto para a actuación de NECTARINE SOUL, que comezará ás 23.00 horas e finalizará as 0.30 h.
MÉRCORES 19 DE AGOSTO
- 23:00 H PRAZA DA ESTACIÓN NECTARINE SOUL
XOVES 20 DE AGOSTO
- 22:30 H PRAZA DA COMPAÑÍA GALGA BLUES BAND
- 00:00 H PRAZA DA COMPAÑÍA BELLA CHAOS
MARTES 25 DE AGOSTO
- 23:00 H PRAZA DA ESTACIÓN MOVILLA Y LOS IRREPETIBLES
MÉRCORES 26 DE AGOSTO
- 22:30 H PRAZA DA COMPAÑÍA DEUCE
- 00:00 H DA COMPAÑÍA LOS JINETES DEL TRÓPICO
XOVES 27 DE AGOSTO
- 22:30 H PRAZA DE ESPAÑA 7 ROJO
- 00:00 H PRAZA DE ESPAÑA EL MUNDO DE SOFÍA BAND