Monforte de Lemos, 4 de xuño de 2022. Como xesto simbólico e en defensa do medio ambiente, o Concello de Monforte súmase mañá domingo 5 de xuño, Día Mundial do Medio Ambiente, á iniciativa europea People and Planet, que suporá un “apagón” en edificios emblemáticos en máis de 20 concellos de toda Galicia e baixo o lema #OnlyOneEarth.
O obxectivo, destaca o Alcalde, José Tomé Roca, “é concienciar á cidadanía sobre a importancia de protexer o noso medio ambiente e loitar contra o cambio climático, e para elo procederemos a apagar a Torre da Homenaxe dende as 23:00 e ata as 00:00 horas, sumándonos así a esta iniciativa europea”.
Aínda que o consumo enerxético diminuíu en Galicia un 11,2% en 2020, tratouse dunha caída coxuntural debida ao descenso da actividade por mor da Covid-19. Segue a ser, por tanto, un tema preocupante na actualidade, polo seu impacto ecolóxico pero tamén na economía das familias, de aí que cumpra seguir fomentando o aforro de enerxía, sen deixar de lado a visión crítica sobre os actuais sistemas de produción.
Tanto as institucións como a cidadanía poden tomar medidas neste senso, como empregar o transporte público ou a bicicleta, elixir aparellos de baixo consumo, programar unha temperatura racional nos espazos pechados, encher ben a lavadora e o lavalouza ou apagar as luces e dispositivos como o ordenador cando non os utilicemos.
En xeral, consumir menos e facelo dun xeito responsable contribúe a combater a emerxencia climática e, polo tanto, a manter o quecemento global por debaixo de 1,5°C neste século, o máximo aceptable para evitar consecuencias irreversibles sobre a vida do planeta e das persoas.
O “apagón ambiental” proposto polo Fondo Galego de Cooperación Ambiental é unha das máis de 50 actividades que se están a impulsar nos concellos socios dentro do proxecto ‘People and Planet’, que van desde accións de rúa como o flashmob e a performance ata obradoiros de cociña sustentable, debuxo urbano, exposicións virtuais, retos virais, etc.
Ademais, neste marco vén de poñerse en marcha en oito países a campaña ‘Water of the future’, co fin de situar na axenda pública a problemática da escaseza de auga a nivel global e as súas graves consecuencias, así como fomentar hábitos sostibles cos que contribuír a mitigar esta situación.
#PeopleAndPlanet
O proxecto ‘People & Planet: un destino común’ ten como obxectivo concienciar as mozas e mozos europeos sobre as graves consecuencias do cambio climático para que se convertan en axentes de transformación na procura dun mundo máis sustentable.
A iniciativa, que botou a andar en novembro de 2020 e que se prolongará durante catro anos, busca tamén reforzar aos gobernos municipais na promoción de políticas a prol do desenvolvemento sostible, tendo en conta a interdependencia local-global.
Procúrase así contribuír a implementar a Axenda 2030, en especial o ODS 13, que chama a adoptar medidas urxentes para loitar contra o cambio climático e os seus efectos. O plan está financiado polo programa DEAR da Comisión Europea e involucra a 19 entidades de Galicia, Portugal, Alemaña, Irlanda, Italia, Polonia, Romanía, Países Baixos e Cabo Verde.