Monforte de Lemos, 12 de xullo de 2025. O Alcalde de Monforte, José Tomé Roca, acompañado por outros membros do Equipo de Goberno entre os que se atopaban a Tenente Alcalde, Gloria Prada, o Concelleiro de Medio Ambiente, obras e servizos, José Luis Losada, a Concelleira de Consumo, Regina López e a Concelleira de Muller e Igualdade, Margarita López, participaron na manifestación convocada para hoxe sábado día 12 de xullo, ás 11:00 horas na Praza de España de Monforte de Lemos, reivindicando unha paz xusta e o alto ó fogo definitivo co lema “Pola Paz, polo fin do xenocidio”.
A concentración convocada pola plataforma pararlaguerra.es invitou á cidadanía, sen distincións de ideoloxías ou credos, sen importar a rexión ou o pais no que se viva, a apoiar a mobilización e acudir ás concentracións pola Paz e polo Fin do Xenocidio que tiveron lugar nas principais cidades da nosa xeografía.
Tal e como se desprende do manifesto da plataforma citada, é hora de transformar a indignación que arrasa o mundo en accións pacíficas, unidas e solidarias contra o xenocidio e pola paz. “A guerra non nos é indiferente, porque é un gran monstruo e pisotea toda a pobre inocencia da xente”
Este inferno é especialmente cruel para os nenos, que segundo as advertencias da ONU, poderían comezar a morrer por miles cada días se a axuda humanitaria non chega de inmediato. Estamos ante un dos momentos mais crueis e mortíferos da matanza que o goberno israelí leva vinte meses perpetrando na Franxa. Está en perigo a paz na rexión e en todo o mundo, producíndose un salto na escalada de guerra e na posibilidade dun conflito internacional de imprevisibles consecuencias.
Ante a situación desoladora, a plataforma paralaguerra.es convoca a toda a cidadanía a realizar concentracións pacíficas para expresar o rexeitamento ó conflito que estamos a vivir e reivindicar entre todos unha Paz Xusta e o cesamento do fogo definitivo.