Monforte de Lemos, 29 de abril de 2026. O Alcalde de Monforte, José Tomé Roca, acompañado pola Tenente Alcalde, Gloria Prada, asistiu esta tarde á xornada conmemorativa e de divulgación social polo 40 aniversario do Hospital Público de Monforte, que se desenvolveu na Casa da Cultura Lois Pereiro.
O acto foi inaugurado polo Xerente da Área Sanitaria de Lugo, A Mariña e Monforte de Lemos, Ramón Ares Rico, e pola Directora do Distrito Sanitario de Monforte, María Inmaculada Ramos, e contou con tres mesas redondas nas que participaron diferentes profesionais dos ámbitos da saúde, a investigación e a docencia que abordaron cuestións como o impacto do Hospital de Monforte no ensino das ciencias da saúde e na economía ou as aportacións deste centro sanitario á investigación sanitaria.
Así mesmo, o historiador e cronista de Monforte, Felipe Aira, fixo un repaso pola historia e realidade social do Hospital de Monforte nestes 40 anos.