Monforte de Lemos, 21 de outubro de 2026. O Alcalde de Monforte, José Tomé Roca, vén de informar da organización dunha nova edición do tradicional Mercado de Outono, unha iniciativa que combina a comercialización de produtos de tempada con actividades de lecer para todos os públicos, coincidindo coa celebración do Samaín.
O evento terá lugar o vindeiro sábado, 31 de outubro, na Praza de Abastos de Monforte, en horario de mañá e tarde de 10.00 a 14.00 horas e de 17.00 a 20.30 horas, e ofrecerá unha ampla variedade de produtos propios desta época do ano, como cogomelos, castañas, noces, mel, viño, queixos, embutidos e doces, entre outros, poñendo en valor a calidade dos produtos de proximidade e o traballo dos produtores e comerciantes.
Esta actividade completarase cunha ampla programación de actividades infantís e familiares vinculadas á celebración do Samaín. Haberá obradoiros para nenos e nenas, unha xincana temática, pintacaras e unha sesión de contos e lendas relacionadas con esta tradición.
Ademais, as persoas asistentes poderán participar nun ‘showcooking’ de outono a cargo dun chef, no que se elaborarán e degustarán tres tipos de tapas preparadas con produtos de proximidade, como cogomelos, castañas e outros ingredientes propios desta estación.
As inscricións nas actividades realizaranse quince minutos antes do inicio de cada unha delas, ata completar as prazas dispoñibles.
Dinamización do comercio de proximidade
O Alcalde, José Tomé, destaca a importancia de iniciativas coma esta para impulsar a actividade comercial e económica da cidade. “Desde o Equipo de Goberno seguimos apostando pola dinamización do comercio de proximidade e por dar visibilidade aos produtos de tempada e aos produtores da nosa contorna”, apunta. Este tipo de mercados temáticos, engade, “permiten achegar á cidadanía a calidade dos produtos locais, ao tempo que contribúen a crear actividade económica e a fortalecer o tecido comercial de Monforte”.
Neste senso, o rexedor subliña tamén o valor destas propostas para dinamizar a cidade e ofrecer alternativas de ocio á veciñanza: “Queremos que Monforte conte cunha programación variada ao longo de todo o ano, que anime as rúas e os espazos comerciais, atraia visitantes e permita que persoas de todas as idades desfruten de actividades compartidas”, indica. O Mercado de Outono, conclúe, “é unha oportunidade para combinar compras, gastronomía e diversión nun espazo como é a nosa Praza de Abastos”.
Prazo de inscrición para os postos de venda
As persoas interesadas en participar no mercado con postos de venda poden presentar a súa solicitude ata o 29 de outubro.
PROGRAMA DO MERCADO DE OUTONO 2026
- 10:00 h. Apertura do mercado.
- 11:30 h. Inauguración e exposición de cogomelos, con charla-presentación.
- 12:00 a 14:00 h. Obradoiros infantís “Benvido Outono”.
- 17:00 a 18:30 h. Xincana do Samaín, organizada por grupos de idade, con tres pases, un cada media hora.
- 17:00 a 18:00 h. Pintacaras tenebroso.
- 18:30 a 19:30 h. Contos e lendas do Samaín.
- 19:30 a 20:30 h. Showcooking “Con sabor a outono”.
Máis información: Concello de Monforte Lemos. Área Promoción Económica. Casitas de Compañía. Teléfonos: 982 884 775 / 698 181 551.
Solicitude Mercado de outono Monforte 2026.pdf