Monforte de Lemos, 19 de marzo de 2026. O Alcalde de Monforte, José Tomé Roca, participou esta mañá na viaxe inaugural da tempada 2026 das rutas fluviais pola Ribeira Sacra, que teñen como punto de partida o embarcadoiro Ponte do Sil, en Monforte de Lemos. A campaña estenderase ata decembro de 2026 e estréase con 14.000 reservas xa realizadas para o conxunto da tempada. Un “excelente comezo”, indica o Alcalde, xa que estas rutas en catamarán polo río Sil “constitúen un dos principais elementos de atracción turística de Monforte, e do conxunto da Ribeira Sacra”.
O rexedor, xunto coa Tenente Alcalde do Concello de Monforte, Gloria Prada, e o Concelleiro de Medio Ambiente, Obras, Medio Rural e Servizos, José Luis Losada, acompañou á Presidenta da Deputación de Lugo, Carmela López, nesta primeira viaxe dos catamaráns, á que asistiron outras autoridades provinciais e Alcaldes e representantes municipais da Comarca e dos Concellos que conforman a Ribeira Sacra.
A tempada arranca con case mil reservas para a Semana Santa e preto de 14.000 para o total da tempada, que rematará na ponte festiva de decembro. Moi bos datos, incide o Alcalde, para quen “estas rutas son, sen dúbida, un motor fundamental para a dinamización económica do noso Concello, capital da Ribeira Sacra”.
Reservas, datas e horas para as viaxes en catamarán
Nesta nova tempada mantéñense os dous percorridos: a Ruta Fluvial Canón do Sil, que parte do embarcadoiro da Deputación Ponte de Sil, en Monforte de Lemos; e a Ruta Fluvial do Cabo do Mundo, que parte de Belesar Pobo, no Saviñao, e vai polo Miño. As persoas interesadas en desfrutar dos percorridos poden adquirir os seus billetes en reservas.rutasembalses.es.
No caso da ruta fluvial Canón do Sil funcionarán dúas travesías cunha capacidade total de 159 prazas, distribuídas en 107 prazas no catamarán Mencía e 53 na embarcación Canón do Sil. Pola súa banda, a ruta fluvial Cabo do Mundo contará cunha capacidade total de 63 viaxeiros no catamarán Pelegrín.
No mes de marzo, as viaxes pola ruta do Canón do Sil, con saída desde o embarcadoiro de Monforte, comezan o xoves día 19, con saídas tamén as fins de semana do 21 e 22 e do 28 e 29, en horario de mañá e tarde, ás 11:30 e ás 16:00 horas. Con motivo da Semana Santa, o servizo será ininterrompido do luns 30 de marzo ao domingo 5 de abril. Durante esas datas, o catamarán Mencía operará con saídas entre as 11:30 e as 16:30 horas, mentres que o Canón do Sil realizará percorridos entre as 11:00 e as 16:00 horas. Durante o resto do mes de abril, os catamaráns da Deputación navegarán de mércores a domingo pola ruta do Canón do Sil, mentres que a ruta do Cabo do Mundo contará con saídas as fins de semana.
No mes de maio, a ruta do Canón do Sil estará dispoñible de mércores a venres, con saídas ás 11:30 e ás 16:30 horas no Mencía, e as fins de semana ampliaranse os horarios, con percorridos desde as 11:30 ata as 17:00 horas no Mencía e desde as 11:00 ata as 16:30 horas no Canón do Sil. Con motivo da ponte do 1 de maio, as saídas realizaranse ás 11:30 e ás 17:00 horas no Mencía e ás 11:00 e ás 16:30 horas no Canón do Sil.
Durante os meses de xuño, xullo, agosto e setembro, considerados de tempada alta, haberá servizo diario de luns a domingo, tanto en horario de mañá como de tarde, con diferentes franxas horarias en ambas embarcacións. A partir do 1 de outubro, as rutas pasarán a funcionar de mércores a domingo, con saídas ás 11:30 e ás 16:30 horas no Mencía, e as fins de semana engadiranse tamén percorridos ás 11:00 e ás 16:00 horas no Canón do Sil. Na ponte de outubro, o día 12 navegarán ambas embarcacións, mentres que o día 13 operará unicamente o Mencía no seu horario habitual. En novembro, o servizo limitarase ás fins de semana, con saídas do Mencía, e en decembro funcionará do día 1 ao 8, data na que finalizará a tempada.
No que respecta á Ruta Fluvial do Cabo do Mundo, en xuño habilitaranse viaxes as fins de semana con tres frecuencias horarias, ás 11:30, ás 16:30 e ás 19:00 horas. Durante os meses de xullo, agosto e ata a primeira quincena de setembro, o servizo funcionará todos os días da semana. Na segunda quincena de setembro, haberá dúas frecuencias, ás 11:00 e ás 16:30 horas. En outubro, as saídas estarán dispoñibles as fins de semana e o día 12, con horarios ás 11:30 e ás 16:30 horas. En novembro, as viaxes realizaranse tamén as fins de semana, con saídas ás 11:30 e ás 16:00 horas, mentres que en decembro o servizo estará operativo do 1 ao 8, nas mesmas franxas horarias.