O Concello licita os Campamentos Deportivos de Verán, nos que xa se poderá solicitar praza desde o vindeiro luns 11 de maio | web Oficial do Concello de Monforte de Lemos

Fecha de publicación 08/05/2026

Monforte de Lemos, 8 de maio de 2026. O Concello de Monforte pon en marcha a maquinaria do Programa Deportivo de Verán 2026, unha iniciativa que ten por obxectivo ofertar actividades lúdicas e educativas para os nenos e nenas de Monforte ao tempo que ofrece unha alternativa de conciliación para as familias monfortinas durante as vacacións estivais.

Con esta finalidade, o Alcalde de Monforte, José Tomé Roca, ven de anunciar que o prazo de preinscrición nas diferentes actividades estará aberto desde o vindeiro luns, día 11 de maio, ata o 20 de maio. Así mesmo, o rexedor deu a coñecer tamén a licitación do contrato para a prestación do servizo dos Campamentos Deportivos de verán durante os anos 2026 e 2027 logo de que a Xunta de Goberno Local dera luz verde na reunión do pasado luns ao procedemento de contratación, cun orzamento estimado de 169.879,16€ e 2 anos de duración. O prazo para a presentación das ofertas para este concurso finaliza o vindeiro 20 de maio.

O obxecto do contrato é a prestación do servizo de campamento deportivo de verán para nenos e nenas de entre 5 e 13 anos durante as vacacións de verán dos anos 2026 e 2027, coa posibilidade de prórroga por 2 anos.

O Alcalde destaca a importancia desta actividade e do conxunto do Programa Deportivo de Verán, xa consolidada na programación do verán de Monforte e moi demandada polas familias, que ten por obxectivo “facilitar a atención infantil como medida de conciliación persoal, laboral e familiar, así como favorecer a integración social no ámbito local e a promoción do deporte en favor dunha vida e saudable e activa”. Neste senso, engade que con esta oferta de conciliación, “os nenos e nenas poderán desfrutar das súas vacacións a través do Campamento Deportivo do Concello, practicando un variado número de actividades, tanto deportivas coma excursións e obradoiros”.

Prazas e actividades dos Campamentos de Verán

O número total de prazas ofertadas é de 360, distribuídas en tres quendas de 120 prazas por quenda.

Segundo recollen os pregos do procedemento de contratación, as actividades que o licitador debe propoñer para levar a cabo nas diferentes quincenas dos campamentos municipais deben ter carácter lúdico-educativo, fomentar a identidade e autonomía persoal, a comunicación, a expresión e creatividade, favorecer o respecto polo medio ambiente, formación e saúde e deporte.

De tal xeito que o programa deberá, como mínimo, incluír xogos predeportivos e actividades deportivo-recreativas, actividades para o desenvolvemento da coordinación de movementos, obradoiros, xogos dirixidos, saídas e excursións e unha actividade especial de peche para cada quincena.

O Campamento Deportivo de verán desenvolverase en diversas instalacións municipais. Concretamente, no Complexo Deportivo Municipal de Pinguela (pavillón e piscina climatizada cuberta), no Pavillón do IES Pinguela, Pistas de atletismo municipais, Campo de fútbol municipal Luis Bodegas e Parques públicos.

PROGRAMA DEPORTIVO DE VERÁN 2026

A partir do luns, 11 de maio, todas as persoas interesadas poderán realizar a preinscrición nalgunha das actividades que forman parte da programación deportiva que o Concello de Monforte oferta para o verán 2026. O prazo de preinscricións estará aberto ata o 20 de maio.

As actividades ofertadas son as seguintes:

• CAMPAMENTO DEPORTIVO DE VERÁN

• XX CAMPUS DE FÚTBOL CIDADE DE MONFORTE – R.C. CELTA DE VIGO

• CURSOS DE TENIS

• CURSOS DE NATACIÓN NA PISCINA MUNICIPAL

CAMPAMENTO DEPORTIVO DE VERÁN:

Esta actividade pretende aproveitar a recreación deportiva como ferramenta na ocupación do tempo libre e de lecer dos nenos e nenas.

O Campamento está distribuído en 3 quendas, correspondentes aos seguintes períodos:

1º. 1-15 de xullo

2º. 16-31 de xullo

3º. 1-14 de agosto

O horario de cada unha das quendas é de luns a venres de 10:00 a 14:00 horas.

Ofértanse un total de 120 prazas por quenda distribuídas do seguinte xeito:

• Prazas en quenda ordinaria: 106

• Prazas reservadas para persoas con discapacidade igual ou superior ao 33 %: 6

• Prazas a disposición dos Servizos Sociais do Concello de Monforte: 8

No transcurso de cada unha das xornadas de actividade as persoas participantes desfrutarán realizando actividades multideportivas, tanto a cuberto como ao aire libre, excursións e obradoiros diversos.

Nesta actividade poderán participar nenos e nenas nados/as entre o 01.01.2013 e o 31.12.2021

Para todas as persoas que o precisen habilitarase un servizo de transporte tanto para a ida como para a volta da actividade.

O custe de cada unha das quendas do campamento é o seguinte:

Matrícula sen trasporte: 51,75 € por quincena.
Matrícula con transporte: 67,28 € por quincena
Ás familias numerosas terán un desconto do 50%

REQUISITOS PARA PARTICIPAR NOS CAMPAMENTOS DEPORTIVOS:

1. Cumprir coa idade establecida

2. Estar empadroado/a no Concello de Monforte. No caso de que o neno/a non estea empadroado/a no Concello de Monforte poderá participar se o está algún dos seus proxenitores (pai ou nai) ou algún dos seus avós.

3. No caso das prazas reservadas para persoas con discapacidade igual ou superior ao 33%, ter recoñecemento da situación de discapacidade.

Terán preferencia aquelas persoas cuxos proxenitores traballen os dous, e as familias monoparentais. Estas situacións deberán de acreditarse ao realizar a preinscrición, coa aportación da seguinte documentación:

No caso de que os dous proxenitores traballen, e así o fagan constar no formulario:

-Libro de familia (de todas as follas cubertas)

-Documentación que acredite que os dous proxenitores están traballando:

No caso de traballadores/as por conta allea: vida laboral ou certificado de empresa que o acredite.

No caso de traballadores/as por conta propia: vida laboral ou último recibo do pago da cota á Seguridade Social.

No caso de familia monoparental e así o fagan constar no formulario: certificado acreditativo emitido polo organismo correspondente.

XX CAMPUS DE FÚTBOL CIDADE DE MONFORTE:

O Concello de Monforte organiza a vixésima edición do Campus de Fútbol Cidade de Monforte – R.C. Celta de Vigo, que ten como obxectivo que nenos e nenas, rapaces e rapazas, poidan gozar dunhas vacacións activas practicando deporte, ademais de ter a oportunidade de facelo da man de monitores que traballan dentro da estrutura dun Club de Fútbol Profesional como e o R.C. Celta de Vigo.

Esta actividade celebrarase entre o 27 e o 31 de xullo en horario de 10:00 a 13:00 horas no Campo Municipal de Fútbol Luis Bodegas.

Trátase dunha actividade dirixida a nenos e nenas nados/as entre o 01.01.2012 e o 31.12.2019

O número de prazas ofertadas na actividade é de 100.

O custe da actividade é de 26,91 €. As familias numerosas terán un desconto do 50%.

REQUISITOS PARA PARTICIPAR NO CAMPUS DE FÚTBOL:

1. Cumprir coa idade establecida

CURSOS DE TENIS

Os cursos de tenis están distribuídos en 3 quendas:

• do 1 ao 15 de xullo

• do 16 ao 31 de xullo

• do 1 ao 14 de agosto

Trátase dunha actividade dirixida a nenos e nenas nados/as entre o 01.01.2015 e o 31.12.2021

Establécense un máximo de 3 grupos de actividade por quenda. O número de prazas de cada un dos grupos será de 6 persoas.

O horario das clases en cada unha das quendas será os martes e xoves non festivos (clases de 1 hora de duración a partir das 10:00 horas).

O custe da actividade é de 20,70€. As familias numerosas terán un desconto do 50%.

O lugar de celebración será as Pistas Municipais de tenis da Pinguela.

REQUISITOS PARA PARTICIPAR NO CURSOS DE TENIS:

1. Cumprir coa idade establecida.

TIPO DE SOLICITUDE E PRAZO DE PRESENTACIÓN:

• As persoas interesadas en participar nos Campamentos de Verán, Campus de Fútbol e/ou nos Cursos de Tenis, deberán facer unha solicitude de preinscrición a través do Rexistro Xeral do Concello de Monforte (ben presencial ou electrónico) entre o 11 e o 20 de maio de 2026.

• As solicitudes poderán presentarse de xeito individual ou múltiple. Poderán presentar unha solicitude múltiple para o suposto de dous/dúas, tres e ata catro irmáns/ás. Esta solicitude múltiple só se poderá empregar no caso de persoas que soliciten idéntica/s quenda/s.

As solicitudes múltiples teñen efecto durante o sorteo para a adxudicación de prazas e xerar as listas de agarda. No obstante, no momento das adxudicacións dende a lista de agarda, teranse en conta como solicitudes individuais.

• No caso do Campamento Deportivo, as persoas con discapacidade igual ou superior ao 33% poderán escoller entre presentar solicitude a través do procedemento xeral ou polo procedemento das prazas reservadas para persoas con discapacidade, de xeito que quedarán excluídas no suposto de que presenten a solicitude por ambos os procedementos.

• A publicación de lista de persoas preinscritas e estado da documentación presentada será o día 25 de maio.

• Período de emenda de solicitudes do 26 ao 29 de maio, a través do Rexistro Xeral do Concello de Monforte. No caso de que a documentación a emendar teña que ver cos criterios de preferencia aplicables, e de non presentarse, non se terán en conta á hora do reparto das prazas.

• Sorteo de prazas, no caso e ser necesario, o día 3 de xuño. No sorteo estará presente un/unha funcionario/a municipal que dará fe do resultado do sorteo.

• Publicación de lista de persoas admitidas e lista de agarda o día 5 de xuño.

• Matrícula definitiva, en función das prazas concedidas, entre o 8 e o 19 de xuño. A matrícula definitiva poderá facerse de dous xeitos:

- Enviando toda a documentación requirida por correo electrónico ao enderezo deporte.veran@concellodemonforte.com

- Presentando toda a documentación requirida nas Oficinas Municipais de Deportes e Xuventude sitas nas Casitas da Compañía.

PROCEDEMENTO DE ADXUDICACIÓN DE PRAZAS

Se o número de solicitudes non supera o número de prazas ofertadas, estas serán de adxudicación directa. En caso contrario, aplicaranse os criterios de preferencia, se os hai, e el última instancia e de ser necesario realizarase sorteo.

No caso de solicitude múltiple entenderase que se no sorteo de prazas algunha das persoas integrantes da solicitude obtén praza, tamén a obterán o resto.

DOCUMENTACION A PRESENTAR

• PREINSCRICIÓN (entre o 11 e o 20 de maio de 2026):

Para todas as actividades:

Formulario de preinscrición establecido.
No caso de solicitude múltiple: fotocopia do libro de familia onde consten todos os membros da unidade familiar.
No caso de nenos e nenas con discapacidade igual ou superior ao 33%: certificado de discapacidade.
No caso de que o neno/a non estea empadroado no Concello de Monforte pero si que o estea algún dos seus proxenitores (pai ou nai), fotocopia do libro de familia onde consten todos os membros da unidade familiar.
No caso de que nin o neno/a nin os seus proxenitores estean empadroados no Concello de Monforte pero si que o estea algún dos seus avós, fotocopia do libro de familia dos pais e os avós.

Especificamente para o Campamento Deportivo (de ser o caso):

No caso de que os dous proxenitores traballen, e así o fagan constar no formulario:

Fotocopia libro de familia onde consten todos os membros da unidade familiar.
Documentación que acredite que os dous proxenitores están traballando:

No caso de traballadores/as por conta allea: vida laboral ou certificado de empresa que o acredite.
No caso de traballadores/as por conta propia: vida laboral ou último recibo do pago da cota á Seguridade Social.

No caso de familia monoparental e así o fagan constar no formulario: certificado acreditativo emitido polo organismo correspondente.

• MATRÍCULA DEFINITIVA en función das prazas concedidas (entre o 8 e o 19 de xuño):

Formulario de matrícula definitivo en función das prazas concedidas.
No caso de nenos e nenas con discapacidade igual ou superior ao 33 %: cuestionario de saúde e autonomía persoal, co fin de planificar os apoios necesarios.

Esta documentación poderá presentarse de dous xeitos:

Enviando toda a documentación requirida por correo electrónico ao enderezo deporte.veran@concellodemonforte.com
Presentando toda a documentación requirida nas Oficinas Municipais de Deportes ou Xuventude sitas nas Casitas da Compañía.

PAGO DA MATRÍCULA:

As persoas con praza, unha vez presentada a documentación requirida para a inscrición definitiva, faráselles entrega, ben presencialmente ou a través do correo electrónico indicado pola persoa interesada, da carta de pago correspondente coa súa inscrición. O pago poderano facer en Abanca, presentando a carta de pago, ou a través da pasarela de pagos habilitada na páxina web www.monfortedelemos.es A data límite para realizar o pago será o 19 de xuño.

CURSOS DE NATACIÓN NA PISCINA MUNICIPAL:

Os cursos de natación de verán levaranse a cabo na Piscina Climatizada Municipal durante os meses de xullo e agosto. Estes cursos están dirixidos tanto a nenos e nenas como a persoas adultas. Haberá cursos intensivos de 15 días de luns a venres (para infantil e nenos) e cursos mensuais de dous días a semana (bebés, adultos +16 e ximnasia acuática).

A oferta de cursos é a seguinte:

• CURSOS INFANTIL E NENOS: cursos intensivos quicenais de luns a venres

1ª quenda: do 1 ao 15 de xullo
2ª quenda: do 16 ao 31 de xullo
3ª quenda: do 1 ao 15 de agosto
4ª quenda: do 16 ao 31 de agosto

	HORARIO	PRAZAS/QUENDA	DÍAS
NENOS (iniciación e perfeccionamento)	10:45	15	DE LUNS A VENRES
NENOS (iniciación e perfeccionamento)	12:15	15	DE LUNS A VENRES
INFANTIL (iniciación e perfeccionamento)	11:30	15	DE LUNS A VENRES
INFANTIL (iniciación e perfeccionamento)	12:15	15	DE LUNS A VENRES

• CURSOS DE BEBÉS, ADULTOS (+16 anos) E XIMNASIA ACUÁTICA: cursos mensuais dous días á semana

	HORARIO	PRAZAS/QUENDA	DÍAS
BEBÉS	19:15	10	LUNS E MÉRCORES
ADULTOS +16 (iniciación e perfeccionamento)	8:00	10	LUNS E MÉRCORES
ADULTOS +16 (iniciación e perfeccionamento)	9:15	10	LUNS E MÉRCORES
ADULTOS +16 (iniciación e perfeccionamento)	20:30	10	LUNS E MÉRCORES
ADULTOS +16 (iniciación e perfeccionamento)	21:15	10	LUNS E MÉRCORES
XIMNASIA ACUÁTICA	10:00	10	LUNS E MÉRCORES