Programa ACTIVA 2025-2026
O Alcalde de Monforte, José Tomé Roca, acompañado pola primeira Tenente de Alcalde de Monforte, Gloria Prada, e pola coordinadora de Servizos Sociais do Concello, Luz Méndez, presentou hoxe en rolda de prensa a posta en marcha dunha nova edición do Programa Activa, que se desenvolverá durante a tempada 2025-2026. Este plan comezou no ano 2016, polo que tería que cumprir a décima edición, pero suspendeuse dous anos pola pandemia.
Tal e como subliñou o rexedor, esta nova edición destaca polo aumento do número de actividades e prazas, a redución do número de participantes nalgunhas actividades (como é o caso de “Conservando a memoria”, pasando de 2 a 4 grupos) para ofrecer unha atención máis personalizada, a prevención da soidade non desexada e a recuperación das actividades na piscina climatizada municipal.
“Como cada ano, desde que son Alcalde desta cidade”, explicou José Tomé, “ideamos e desenvolvemos este Programa Activa pensando especialmente nos nosos maiores, porque é un dos colectivos que necesita de actividades que lle proporcionen un envellecemento activo e saudable”.
O Programa Activa “é un dos principais compromisos adquiridos na nosa acción de goberno e ademais somos coñecedores das ganas que teñen os veciños e veciñas de Monforte de que este programa dea comezo”, apuntou o rexedor, destacando o aumento da participación ano a ano desde que puxo en marcha o programa cando chegou a Alcaldía.
A mostra deste compromiso do Executivo de José Tomé co Programa Activa, é que nesta edición increméntase a súa partida orzamentaria en 4.000€, alcanzando así os 60.000€, para atender á demanda existente. Tamén anunciou o Alcalde que “aumentaremos a súa partida para o ano 2026”.
O prazo de inscrición tanto para actividades no Centro Cívico como nos Locais Sociais das parroquias, permanecerá aberto desde o luns 15 de setembro ata o martes 30 de setembro, ambos incluídos.
As actividades, que son gratuítas para os veciños e veciñas de Monforte e están subvencionadas ao 100% polo Cocnello, comezarán o 20 de outubro, e se estenderán ata o 12 de xuño, o que supón un total de 9 meses de actividade.
Obxectivos
José Tomé explicou que os obxectivos que se marca este Programa Activa, dirixido aos veciños e veciñas de Monforte son, “por unha banda, promover o envellecemento activo e, por outra, mellorar a calidade de vida das persoas maiores”.
Segundo os datos do padrón municipal de agosto de 2025 o índice de poboación de persoas de máis de 55 anos no Concello de Monforte é do 43,80% respecto da poboación total. Cómpre salientar que 8.657 persoas veciñas superan este umbral, sendo o colectivo máis predominante de 55 a 79 anos.
“Polo tanto, é un programa especialmente dirixido a estas franxas de idade, cun dobre obxectivo: favorecer o envellecemento activo e mellorar a calidade de vida dos adultos maiores, promovendo o seu benestar psicosocial, fomentando a participación social, habilitando espazos de encontro interxeracional, evitando o illamento e as situacións de soidade, e dinamizando as nosas parroquias rurais” subliñou o Alcalde monfortino.
Neste senso, recalcou especialmente a importancia destas actividades como recurso para previr a soidade non desexada, facendo deste Programa Activa un punto de encontro “no que se promove a formación, pero tamén a interacción e participación das persoas maiores”. A prevención da soidade non desexada “é un beneficio que constatan os propios participantes nos seus comentarios”, afirmou o Alcalde.
No Programa Activa dáse prioridade de participación aos maiores de 55 anos, pero como en edicións anteriores, tamén se ofertarán actividades interxeracionais, dirixidas a persoas maiores de 16 anos.
Novidades do Programa Activa 2025-26
Unha das principais novidades do plan deste ano é a Ximnasia Acuática, que quedou interrompida polas obras de reforma integral das instalacións. José Tomé anunciou que esta actividade regresa ao calendario do Programa Activa, e detallou que, neste caso, “o inicio do curso está condicionado á apertura das instalacións”.
Ademais, e debido ao éxito acadado polo Obradoiro interxeracional “Av@s 3.0”, que foi unha das novidades da pasada edición, José Tomé anunciou que terá continuidade. “Trátase dun taller no que queremos que participen os avós e avoas cos seus netos e netas, e promover nel o intercambio interxeracional de coñecementos a través de espazos común de convivencia”. A previsión será celebrar este obradoiro en Nadal.
Outra das novidades que desenvolverá o Programa Activa nesta décima edición é o Taller de cociña orientada á nutrición e á alimentación saudable, dirixido a persoas maiores e impartido por especialistas nesta materia. Este curso terá unha duración de tres días, e ademais de preparar receitas saudables, incidirá na importancia dunha nutrición adecuada e adaptada a estas idades.
“En canto ás actividades ofertadas, mantemos, como cada ano as que son as máis demandadas polos veciños e veciñas, que así nolo indican na enquisa que fan ó final de cada tempada”, resaltou o Alcalde.
Actividades no Centro Cívico e nas Parroquias
Polo que respecta ao CENTRO CÍVICO, o Concello destina un total de 436 prazas, que son 57 máis que na edición anterior, distribuídas en 26 grupos, 5 máis que en 2024.
As actividades a desenvolver no Centro cívico agrúpanse en dous bloques segundo a idade dos participantes:
- Dirixidas a persoas maiores de 55 anos, que teñen como obxectivo principal promover o envellecemento activo das persoas maiores.
- Dirixidas a persoas maiores de 16 anos, que teñen como obxectivo principal posibilitar espazos de encontro interxeracional.
A oferta de actividades neste Centro Cívico é a seguinte:
- Ximnasia de mantemento para maiores
- Ximnasia Acuática
- Taichi
- Ioga
- Conservando a memoria
- Competencias dixitais para uso cotián con 3 niveis: iniciación, intermedio e avanzado.
- Informática básica
- Cerámica
- Manualidades
- Costura básica
- Costura creativa
- Baile Caribeño, con 2 niveis: iniciación e perfeccionamento.
- Bailes de Salón
Nas PARROQUIAS, o número de prazas ofertadas a través dos seus locais sociais é de 216, están dirixidas ás persoas veciñas de cada parroquia, e inclúense as actividades máis demandadas por aquelas, que son:
- Conservando a memoria
- Cerámica
- Manualidades
- Costura creativa
- Costura básica
- Ximnasia de mantemento
- Bailes de Salón
- Bailes Latinos
Reservarase 1 praza para persoas con discapacidade en cada unha das actividades e no caso de que estas persoas necesiten axuda durante o desenvolvemento da actividade poderán ir acompañadas doutra persoa.
Prazos e requisitos de inscrición
O prazo de inscrición para inscribirse no Plan Activa 2025/2026 permanecerá aberto desde o luns 15 de setembro e ata o martes 30 de setembro de 2025, ambos incluídos.
As persoas interesadas en participar nas actividades do Centro Cívico deberán presentar a súa solicitude, segundo o modelo normalizado, no Rexistro Municipal do Concello, na Secretaría de Servizos Sociais ou a través da Sede Electrónica municipal (sede.monfortelemos.es). Para elo deberán estar censadas no Concello de Monforte.
Como norma xeral, cada persoa poderá solicitar e participar nunha única actividade, para que poida acceder a ela un maior número de persoas, salvo que queden prazas vacantes nas actividades posteriores á súa adxudicación. Nese caso poderá abrirse un período extraordinario ata completar as prazas.
A solicitude deberá ir acompañada da seguinte documentación:
- Documento de identidade (DNI, NIF, pasaporte).
- Certificado de empadroamento.
- Certificado de discapacidade, se é o caso.
A solicitude pode ser individual ou conxunta. Neste último caso, o Concello quere favorecer a participación de persoas con relación familiar na mesma actividade, por exemplo, matrimonios.
A adxudicación das prazas do Centro Cívico farase por sorteo entre as solicitudes recibidas para cada actividade, unha vez rematado o prazo de solicitude e diferenciando prazas ordinarias e prazas para persoas con discapacidade. Para iso, asignarase un número para participar no sorteo por cada solicitude recibida.
No caso de presentarse solicitude de participación conxunta elixirase a praza ou lista de espera cun único número.
O sorteo será público, e publicarase na páxina web do Concello e no centro de servizos sociais a data e lugar da realización do sorteo así como a listaxe de persoas admitidas para participar neste.
No caso das actividades das parroquias, poderán solicitalas os representantes das parroquias, pedáneos ou asociacións, podendo facelo no Centro Cívico dentro do prazo establecido, e a actividade realizarase no local social correspondente.
As persoas interesadas en participar na actividade concedida deberán dirixirse ao pedáneo ou pedánea da parroquia para que proceda a anotalas na actividade. O prazo estará aberto ata completar as prazas ofertadas en cada actividade.
“En resumo”, destacou José Tomé, “desde este Equipo de Goberno, volvemos apostar decididamente polo Programa Activa, e proba delo é o notable aumento de prazas para atender a demanda dos nosos maiores, para que poidan ter unha vida activa. Desde o Concello de Monforte, animamos a todas as persoas interesadas que se inscriban e desexamos que gocen da gran variedade de actividades que ofertamos nesta edición de 2025-2026”.
Cartel Programa Activa 2025-2026
Inscrición programa ACTIVA Centro Cívico
Inscrición programa ACTIVA Parroquias