Mañá sábado 17 de setembro terá lugar o concerto de Rocio Caamaño na praza de España

Monforte de Lemos, 16 de setembro de 2022. O concerto de Rocío Caamaño, celebrarase o mañá sábado 17 de setembro, as 11 da noite, na Praza de España, con acceso gratuíto.

Este concerto formaba parte do programa das Festas Patronais deste ano, e tiña que haberse celebrado o pasado mércores 10 de agosto, tras o pregón de Margarita Rodríguez Otero. Pero as condicións climatolóxicas adversas obrigaron ó Equipo de Goberno do Concello a aprazalo.

 “Dende o Concello cumprimos así co compromiso que adquirimos o pasado 10 de agosto, cando nos comprometimos a estudar novas datas para este concerto, motivo polo que procedemos a aprazalo. Así, mañá sábado 17 de setembro os monfortinos e monfortinas poderán disfrutar deste concerto gratuíto de Rocío Caamaño, artista da Costa da Morte”, sinalou o Alcalde.

 

Rocio Caamaño

A cantautora Rocío Caamaño, natural de Cee, presentará en Monforte o seu primeiro disco, “Enbora”. A formación de música pop desta artista viaxa dende a Costa da Morte ata Monforte con aromas do mar, e algo de sabor a cidade, incorporando nese traxecto pensamentos e vivencias propias.

Dende principios de 2021 publicou 7 singles, varios videoclips e o pasado 25 de xullo de 2022 publicou o seu primeiro álbum, que ten por título ‘Enbora’.

O concerto está organizado polo Concello de Monforte, e conta coa colaboración da Deputación Provincial de Lugo.