Monforte de Lemos, 14 de marzo de 2022. Este xoves 17 de marzo ás 20:15 h e no Edificio Multiusos terá lugar unha nova cita co teatro para adultos dentro da programación da Rede Galega de Dinamización Lingüística da Xunta de Galicia de 2022 en Monforte de Lemos.
A obra enmárcase dentro do programa de actos do 8M Día Internacional da Muller, organizado pola Concellería de Muller e Igualdade e o CIM,
A compañía Matrioshka Teatro representa a peza Comando Comadres, baixo a autoría de Lorena Conde, a dirección de Gena Baamonde e interpretada por Chelo do Rejo, Anabel Gago e Lorena Conde.
No mes en que se conmemora o Día Internacional da Muller e a través da Rede de Dinamización Lingüística da Xunta de Galicia, e como iniciativa para a normalización do uso do galego en todos os ámbitos, o Concello decidiu a inclusión desta obra no seu calendario de actividades culturais.
Dirixida a público adulto, entrada será gratuíta ata completar a capacidade do local seguindo a normativa sanitaria no momento da actuación. A entrada o salón de actos realizarase media hora antes do comezo da obra.
Sinopse
A través do humor un grupo de "artivistas" organizadas en diferentes comandos, poñen en evidencia as múltiples manifestacións da violencia patriarcal e cuestionan a persistencia dos seus valores no pensamento hexemónico actual.
Os Comandos establécense como pequenos grupos de artivistas preparadas para as encomendas máis perigosas: levar a cabo incursións no territorio inimigo para poñer luz sobre a inxustiza e volver airosas da misión.
Son Comandos activos de estratexias impredecibles e irreverentes que van creando unha rede de Comandos Comadres a nivel mundial, centrada na importancia da igualdade de dereitos e deberes sociais entre ambos xéneros tanto no ámbito público coma no privado, dos coidados de ecosistemas sans e equilibrados, así coma dos afectos cos que crear lazos de sororidade e empatía, e coa que rendemos homenaxe a todas as heroínas de a diario, as señoras silenciadas, perseguidas, queimadas, torturadas, os saberes invisibilizados e á historia oculta do noso pasado.
